የኑሮ ውድነቱን ለመቅረፍ እየተሰራ ነው

አዲስ አበባ፣ 8/6/2014 (ንቀትሚ) የኑሮ ውድነቱን ለመቅረፍ እየተሰራ መሆኑን የንግድ እና ቀጠናዊ ትስስር ሚኒስቴር አስታወቀ፡፡

በየሳምንቱ መጨረሻ በአዲስ አበባና ድሬዳዋ የተጀመሩትን አምራች እና ሸማችን በቀጥታ የማገናኘት ተግባር በሁሉም ክልሎች እንዲቀጥል እየተሰራ መሆኑን የንግድ እና ቀጣናዊ ትስስር ሚኒስትር ዴኤታ አቶ ሀሰን መሃመድ  ለፋና ብሮድካስቲንግ ኮርፖሬት ገልጸዋል፡፡

ለዚህም የአሰራር ማእቀፍ በማዘጋጀት ደላላውን ከሰንሰለቱ ለማስወጣት ወደ ተግባር መገባቱን አብራርተዋል፡፡

በዋናነት የምርት አቅርቦትን መጨመር፣ የገበያ ሰንሰለትን ማሳጠርና ህገ ወጥ ግብይትን ተቆጣጣሪ ግብረ ሀይል እስከ ማቋቋም የደረሰ እርምጃ እየተወሰደ ይገኛልም ነው ያሉት፡፡

የግብረ- ሀይሉ ቀዳሚ ስራ የዋጋ ንረቱን መቆጣጠር መሆኑን የተናገሩት  ሚኒስትር ዴኤታው  ግብረ - ሀይሉ ከተቋቋመ በኋላ ሰው ሰራሽ ችግር ለመፍጠር ሲደክሙ በነበሩ ከ82 ሺህ በላይ ነጋዴዎች ላይ እርምጃ በመውሰድ ከ7 ሚሊየን ብር በላይ ቅጣት እንዲከፍሉ ተደርጓል  ብለዋል።

የመሰረታዊ ፍጆታን የዋጋ ንረት ለማረጋጋት ዘይት፣ ስንዴ፣ ስኳር ከውጭ መግባቱ ቀጥሏል ያሉት ሚኒስትር ዴኤታው 4 ሚሊየን ኩንታል ስንዴና ከ10 ሚሊየን ሊትር በላይ ዘይት ገብቶ ወደ ክልሎች ስርጭት መጀመሩንም ተናግረዋል ።

መንግስት የኑሮ ውድነቱን ጫና በመረዳቱ የኢኮኖሚ አሻጥረኞችን የማስወገድ ምርትን የማሳደግና የገበያ ቅርበትን በየአከባቢው የማድረግ ስራውን አጠናክሮ እንደሚቀጥል አቶ ሀሰን ተናግረዋል፡፡

 

Share this Post